Bulan beganti bulan taun beganti taun, enda berasai aku udah idup ba dunya tu kira-kira 31 taun ka udah. 26hb sepuluh tu tadi umur aku udah genap 31 taun. Terima kasih ngagai Tuhan laban ngemanjai ka umur sereta meri berekat ti enda putus-putus ngagai pengidup aku.
Macam-macam utai dirempuh tauka ditengah lebuh maya idup ba dunya tu, penusah enggau penyenang sigi enda kala lari ari pengidup kitai mensia sebaka mega pemerinsa enggau pengelantang. Tuhan sigi adil nentu ka pengidup kitai, nya alai lebuh pengidup kitai bejalai kitai enda tau enda ingat ka sapa ti ngaga sereta nentu ka pengidup kitai ianya Tuhan.
Dalam taun tu mega, penusah besai nuntung ruang bilik kami ianya pemati niang adi aku ka biak. Ti nitih ka ati, nadai tuju nerus ka idup laban orang ka disayau udah ninggal ka kitai kelebih agi ti umur agi biak, laban ba pikir kitai mensia, agi mayoh utai ti ulih dikerja ti bedau diasai ka orang ninggal ka dunya tu ba maya biak. Tang Tuhan bisi cara Iya empu ngatur pengidup kitai, seput, pemati, pengidup kitai enggi Tuhan.
Dalam kandang 31 taun tu mega, seudah aku graduate ari Kolej Yayasan Melaka (KYM), ianya ka bepun ka pengawa aku dalam nyukung diri sebilik kelebih agi aku mayoh bala menyadi ti biak ari aku. Tuhan endang adil, seagi agi kitai bekerja enggau bendar Tuhan sigi enda lokek nurun ka berkat ngagai ruang bilik. Diatu, enda ga kaya raja bulih reta tengkira, tang asai aku tanggungjawab aku ba ruang bilik sigi udah digaga aku enggau naka ulih. Nadai utai ulih ngelantang ka ati kelimpah ari meda diri sebilik gaga.
0 comments:
Post a Comment